Sólbaðsdagur:-)

Það var svo indislegt að vakna og þurfa bara ekkert að gera, setja í eina þvottavél, en hvað er það? Ég borðaði morgunmatinn úti á terrasi og er nú komin á bikini og ætla að leggjast í sólbað. Gabriel þurfti að fara á fund svo ég á mig sjálf þar til hann kemur heim. Ég hef mikla löngun til að fara í gróðrastöð seinna í dag og verða mér út um mold og potta, þarf að umpotta trjám, en hvort við ráðumst í það eða fáum garyrkjumanninn veit ég ekki enn. Og, ef maður fer á annað borð í gróðrastöð þá kaupir maður nú plöntur og jafnvel kryddjurtir. Tómatplantan mín lagði upp laupana og ég hef ekki séð ástæðu til að setja niður fræ, held bara að ég kaupi myndalega plöntu.

Vínsmökkunin í gær var mjög skemmtileg, smökkuð voru 4 rauðvín og 2 hvítvín frá vínhúsi í Rioja. Eftir að hafa farið mjög faglega í gegnum smökkunina og hvert vín rætt til botns, þefað og bragðað, var boðið upp á osta, skinku og fleira góðgæti og við hvött til að klára allar flöskur sem opnar voru. Það gekk eðlilega mjög vel. Sirka 20 manns voru viðstödd smökkunina. Síðan fluttum við okkur upp í súpermarkaðinn og versluðum ýmisleg nammi gott+vín og héldum heim í leigubíl með fenginn. Áttum svo “gourmet” kvöld heima. Nei, við vorum ekki timbruð í morgun.

Góða helgi öll saman.

Fært undir . 1 ummæli »

Varnarlaus Spánn.

Mér datt í hug þegar ég sleppti fyrri færslunni í loftið að í gær var ég í pásu með Gaua og Binna. Umræðuefnið eins og oft áður, politík. Gaui, auðvitað rasandi yfir ríkisstjórninni og ólétta varnarmálaráð-frúin. Hvað gerist þegar hún fer í fæðingarorlof??? Portugalir ráðast inn í Spán og yfirtaka okkur, þeir hafa alltaf viljað drottna yfir Iberiusaganum;-)

Sem sagt, þegar varnamálaráð-frúin okkar fæðir barn förum við í stríð.

Fært undir . Engin ummæli »

Vínsmökkun og helgi.

Föstudagseftirmiðdgur, klukkan er 17.00 hjá mér, 15.00 hjá ykkur. Þetta hefur verið freka léttur föstudagur eða þannig. Ekki eins mikið að gera og oft áður. Við erum á leið í vínsmökkun hjónin, nokkuð sem við erum boðin til misjafnlega oft. Ég hef bloggað um kunningja okkar sem er úr víngerðarfjölskyldu hér í nágreninu, þessi sama fjölskylda á súpermarkaði í tveim bæjum við Benidorm. Annar þeirra Super La Nucia er allra fínasti súpermarkaðurinn á svæðinu, ekki bara eru þeir með vöruúrval fyrir allan heiminn heldur líka þennan stórkostlega vínkjallara þar sem hægt er að finna öll möguleg (og ómöguleg) vín. Við höfum keypt þar vín frá 1970, sérstakt vín sem hefur reynst mjög gott, en auðvitað er það alltaf happdrætti með svona gömul vín, sumar flöskur eru ónýtar aðrar sem betur fer ekki. Í vínkjallaranum er líka dýrindis aðstaða til að halda mannamót, eins og vínsmökkun.

Hjá þeim hefur Gabriel keypt sér japanskt nautakjöt sem heitir “kobe” og mun vera fínasta nautakjöt sem finnst. Nógu var það dýrt, ég næstum skildi við hann. Yfir 10.000 kr. smá biti fyrir einn mann.

Við erum sem sagt boðin í vínsmökkun hjá þeim á eftir, svo ég ætla að fara að ganga frá tölvunni og pakka niður fyrir helgina.

Heyrumst á morgun.    

Fært undir . Engin ummæli »

Litla systir 50 ára!!!

Sigga litla systir mín, situr úti í götu…Svona hefst skemmtileg vísa sem mikið var sungin á mínu heimili og þá meina ég ekki bara í foreldrahúsum heldur líka þegar ég var með strákana litla.

En Sigga litla systir mín er 50 ára í dag, til hamingju dúllan mín. Hún heldur upp á afmælið í Kaupmannahöfn og hefur það örugglega mjög skemmtilegt.

Það er líka þjóðhatíðardagur Stóra Bretlands í dag. Drottningin fæddist þennan dag, en opinber afmælisdagur hennar er 14. júní sem er afmælisdagurinn minn. Svo við systur tengjumst Bretlandi ansi vel.

Er á leiðinni heim úr vinnu og ætla að eiga rólegt kvöld, gráta yfir mynd sem ég veit ekki hvað heitir á ensku né íslensku, en er víst nokkuð þekkt og mjög sorgleg.

Hasta luego.

Fært undir . 5 ummæli »

Kökuskrímslið hf. í Stykkishólmi. Uppskriftir.

Í eldhúsi einu í Stykkishólmi er mikið bakað. Húsmóðirin og dóttir hennar baka og baka, pabbinn eldar mat. Bökunardeildin í húsinu er kölluð Kökuskrímslið hf. Það er auðvitað bara grín, en öllu gríni fylgir einhver alvara. Svo kanske verður til bakarí eða kaffihús með þessu nafni í Stykkishólmi. Nú, í nýlegu bloggi hjá mér biður húsmóðirin um uppskriftina af Nan brauði. svo hér kemur hún.

NAN brauð: 225 gr. hveiti með lyftidufti (self raising flour), 1 stk, 6 gr. poki ger, 1/2 msk. salt, 2 msk. hreint jogurt, 1. msk. olía, 4 ms. volg mjólk eða vatn. Blanda öllu saman og láta hefast undir klút í ca. hálftíma. Þegar hefun er lokið þá er að hnoða vel þannig að deigið verði mjúkt. Búnar til litlar kúlur og flattar út, bakað undir grilli ca. 2 mín. á hvorri hlið. Pensla með olíu eða smjöri þegar kökurnar koma undan grillinu. Ég bý gjarnan til “samloku” úr tveim deigkökum, set ost á milli og loka vel börmunum. Mjög gott er að blanda hvítlauk, koriander eða öðru í ólíuna áður en penslað er. Ég leik mér gjarnan með Nan, bæði nota ég lifandi ger og í pokum og engan poka á ég sem er 6 gr. Svo í raun er bara að leika sér þar til þið eruð orðin ánægð. Ég veit að í Kökuskrímslinu er mikið notað spelt hveiti og er það örugglega gott í nan líka.

Með indverskum mat er nan ómissandi og líka finnst mér nánast must að hafa Tomat Chutney, uppskrift sem ég fékk frá Kristínu mágkonu minni. Hér kemur hún.

250 gr. döðlur smátt skornar, 1 dós tómatar, 1 smátt skorinn laukur, 3,5 cm. hakkað engifer, 1 tsk chili duft (þetta má minnka mikið, allt eftir smekk) 1.tsk salt (ég minnka þaö) c msk. vínedik. Allt soðið saman 45 mín. Við erum mikið fyrir vel sterkt en þeir sem eru það ekki endilega minnkið chili duftið, ef þiið notði ferskt chili þá farið varlega. En þetta er ofsalega gott og svo auðvelt.

Í dag var slagur í eldhúsinu mínu, djók!! Þegar kom að því að elda vildum við bæði eiga heiðurinn að matnum. Svo niðurstaðan varð sú að ég gerði forréttinn en Gabriel aðalréttinn. Ég tók 1 kúrbít, skar hann í þrent og hvern hluta síðan í tvennt eftir endilöngu, skóf kjarnan úr hvorum helming og fyllti með Camebert osti, lagði helmingana saman og velti vel upp úr 2 þeyttum eggjum, þaðan fóru þeir svo í brauðmylsnu og síðan djúpsteiktir. Þetta var gott af því við höfðum með blönduð skógarber sem ég lagði í líkjör fyrir jólin. Heldur bragðlítið eitt og sér. Ég hef prófað að skera ca. 1 cm. þykkar sneiðar af eggaldin og smyrja gráosti á milli og matreiða eins. Það er mjög gott ef fólki þykir gráðostur góður, en þetta með Camebertinn er OK.

Gabriel bjó til Fidueá sem er réttur gerður eins og Paella nema hvað í stað hrísgrjóna er notað fínt pasta sem heitir Fidueá. Þetta er framleitt á Spáni og á ekkert skilt við Ítalíu. Reyndar eru miklir hrísgrjóna akrar hér í Valencia héraði og hefur það komið mörgum á óvart því einhvern veginn er hrísgrjóna rækt ekki tengd Evrópu í huga fólks. En Fidueá Gabriels í dag var með rauðri papriku, stórum baunum sem eru í uppskeru þessa dagana og ferskum túnfisk. Ég hef verið með honum þegar hann gerir Paellur og Fidueá öll þessi ár en get ekki nákvæmlega sagt hvað hann gerir. Ég notast sjaldan við uppskriftir en hann aldrei. Henn hefur eitthvað í blóðinu sem gerir hann að meistara í eldhúsinu. Og undanfarið hefur hann verið að koma mér á óvart með grænmetisréttum. Um daginn fyllti hann kúrbít með blöndu sem hann gerði í mixaranum sem hann gaf mér í jólagjöf:-( Honum urðu á þau misstök að gefa mér maskínu í jólagjöf, sem ég hef aldrei notað en hann notar nánast við allt. Svo hver var að gefa hverjum?  Hann skar kúrbítinn í tvennt eftir endilöngu, skóf kjötið innan úr en skildi eftir góðan vegg, maukaði saman kúrbítskjötið, feta ost, papriku, gulrót, sömu baunir og við vorum með í dag, egg og einhver krydd. Fyllti svo kúrbítinn og bakaði í ofni. Nammi, namm. Næst þegar þetta verður gert mun ég heimta afrikönsk krydd í, þetta kallaði á slíkt.

Jæja, er ekki komið nóg í bili? Ég á reyndar eftir að gefa ykkur uppskriftina af kjúklingasalatinu frá Siggu systir, ég á eftir að prófa það og blogga um réttinn þegar hann hefur verið etinn.

Fært undir Matur. 3 ummæli »

Þungir þankar á sunnudagsmorgni.

Fyrir 7 árum var viðtal í sjónvarpinu hér við fallega konu á miðjum aldri. Ástæðan var sú að hún var búin að vera að berjast við kerfið í sínu heimahéraði til að fá nálgunarbann sett á son sinn. Það gat hú ekki fengið af því hann var barnið hennar. Þó var hún búin að kæra hann 5 sinnum vegna ofbeldis. Í viðtalinu segist hún óttast um líf sitt, og eins og góð móðir (sem hún öruglega var) segir hún í viðtalinu að sonur sinn sé ekki vondur maður, heldur sé það neysla hans sem geri hann vondan. Það kom ekki fram hver sú neysla var. Nú 7 árum síðar vitum við að sonurinn er haldin geðklofa á mjög háu stigi og aldrei fengið meðhöndlun við því. Af hverju, vitum við ekki. En hvernig vitum við af þessum sjúkdómi hans??? Jú, hann sat á bekk í bænum sínum um daginn og talaði við bréfpoka. Vegfarandi sem átti leið hjá og þekkti manninn spurði hvað hann væri með i pokanum, af hverju hann væri svona reiður við pokagreyið. Hann hefur örugglega aldrei látið sér detta í hug neitt í líkingu við svarið sem hann fékk. “Ég er með höfuðið á henni mömmu, og er að skamma hana” var svarið. Og það reyndist rétt vera, í pokanum var höfuð konunnar sem nú er aftur á sjónvarpsskjánum í endursýndu viðtali frá því fyrir 7 árum.

Ungi maðurinn er eðlilega á geðdeild og væntanlega að fá rétta meðferð, meðferð sem hann hefði þurft fyrir langa, langa löngu. En þetta atvik hefur komið mikilli umræðu um aðstæður geðfatlaðra og fjölskyldna þeirra af stað. Umræðu sem vonandi skilar góðu. Eins og t.d að ríkisstjórnin setji reglur sem gilda í öllum bæjarfélögum, en í dag eru þær jafn misjafnar og bæjarfélögin eru mörg.

Í vikunni komu fyrir rétt hér á Benidorm ensku hjónin sem keyrðu á unga vespu drenginn um daginn. (eg bloggaði um það) Það varð uppi fótur og fit í réttarsalnum þegar verjandi þeirra sagði að þau hefðu ekki framið “mannvonsku” glæp. Það er ekki mannvonska að keyra á manneskju, draga hana með sér langan veg og keyra út á sveitaveg til þess að reyna að losa líkamann undan bílnum. Nú virðist vera sannað að þau þurftu að lyfta bílnum til að ná honum undan, sem gerir glæpinn enn verri. Upphaflega sögðust þau hafa haldið að þau hafi keyrt yfir hund, en hver gerir svona lagað þó það væri hundur, köttur eða annað dýr? Búist er við að það líði ár þar til hægt verði að rétta í málinu vegna umfangs þess.

Þó ég hafi nú upphaflega ætlað að vera skemmtileg á blogginu þá eru bara sum mál sem maður verður að tjá sig um.

En ég ætla að eiga skemmtilegan sunnudag, fara að kíkja í ísskápinn og aðra skápa til að ath. hvort ég geti ekki látið mér detta eitthvað í hug til að malla handa okkur hjónum. Svo stefnum við á bíó í kvöld, engin sérstök mynd ákveðin, eigum eftir að kíkja á hvað er verið að sýna.

Fært undir . Engin ummæli »

Komma-lunch.

Ég bloggaði í morgun en þegar ég ætlaði að vista færsluna var netið niðri.

Við vorum sem sagt boðin til hádegisverðar hjá flokknum mínum, mjög skemmtilegt, algjör útilega, grillað og allir sóttu drykkina í tunnur. Frábær dagur í sól og hita.

En Gaui minn hafði þetta að segja; “Nú já, bara komma veisla”, hann reynir að stríða mér endalaust á þessu komma dæmi. Segist búa í komma landi og vera oriðin minnihlutahópur, 9 konur á móti 8 körlum í ríkisstjórn. Hann hefur gaman að þessu, er vinstri maður í hjarta sínu þó hann hafi aldrei kosið.

Komin nótt hjá mér, sofið vel.

Fært undir . 2 ummæli »

Bloggtími.

Ég sit hér í vinnunni og ætti að vera að gera allt annað en blogga. En í gærkvöldi eftir að ég kom heim og hafði hroft á fréttirnar var ég í slíku stuði til að blogga, nema… tölvan var í vinnunni. Það var skemmtileg sjón að sjá nýja varnarmálaráðherrann/rákonuna komna 7 mánuði á leið tala yfir hernum og ganga svo og kanna varðlínuna eða hvað sem það heitir. Hún tók sig mjög vel út, enda ung og falleg kona. Ekki það að við hinar sem erum ekki lengur á fertugsaldrinum séum ekki ungar og fallegar, en það er bara svolítið skrítin tilhugsun að ef börnin mín væru spænsk þá kanske væri einhver þeirra orðin ráðherra í ríkisstjórn lands sem telur yfir 50 miljónir íbúa. Ekki slæm frammistaða það, 3 af 9 kvenn ráðherrum eru milli 30 og 35 ára. Í fréttunum kom einnig fram að í ráðherranefnd NATO hefðu einungis verið 3 konur þar til í fyrradag að okkar kona bættist í hópinn. Hinar voru frá Íslandi, Noregi og Tékklandi, talið upp í þessari röð. Það þandist út á mér brjóstið, nú á ég 2 konur hjá NATO. 

En nú ætla ég að vinna svolítið og fara svo í eftirmiðdagspásu með sonum mínum.

Fært undir . 1 ummæli »

2000 gestir á bloggið.

Þar sem engin gaf sig fram sem 2000 gesturinn geri ég ráð fyrir að hann hafi verið einhver af þessum ansk… spam heimssóknum. Alltaf spamað við sömu færsluna em er eldgömul. Þoli þetta ekki.

Var með indverskan mat í gær og bakaði nan brauð. Mjög gott.

Fært undir . 1 ummæli »

Leiðrétting á ráðuneyti.

Ég verð að leiðrétta fréttina um ungu ófrísku ráðherrann/konuna okkar, hún er ekki utanríkisráðherra heldur ráðakona varnamála og bindum við miklar vonir við hana. Jafnréttisráðherran/konann er 31 árs og þar með yngsti ráðherra sem verið hefur í ríkisstjórn á Spáni,

En nú ætla ég að fara að baka nan brauð sem ég stefni í að fylla með grænmeti á afrinskan máta í dag.

Fært undir . Engin ummæli »